Sobre a Asemblea Xeral

A AMC Pepe Valiña-Coral Xan Mella celebrou asemblea xeral ordinaria onde fixemos balance do ano 2012 e presentamos o proxecto de actividades para este ano 2013. A asemblea referendou a Antonio Díaz Amor como presidente, que seguirá no cargo catro anos máis coa actual xunta directiva.

A Coral Xan Mella no 2012 tivo un total de 13 actuacións das que 7 foron fora de Baio, destacando as celebradas en Noia, Curtis, Vimianzo, Muxía e Vegadeo (Asturias). Unha coral que cumpriu dez anos de vida e que foi galardoada co Premio Nordés das Artes e que o ano pasado fixo de anfitrioa do Encontro de Corais da Costa da Morte que patrocina a asociación Neria e que logrou contar para tal evento cun total de 7 corais da bisbarra, algo nunca visto por estas voltas.

Para o 2013 a Coral ten preparadas, polo de agora, actuacións en Carballo, Pontedeume, Ribadeo (Lugo) e Arbo (Pontevedra) e celebrará o 15 de xuño o XI Certame de corais en Baio e xa en Nadal, o 14 de decembro, o X Memorial Pepe Valiña.

A Escola de Música da Asociación Pepe Valiña segue a ser un referente na bisbarra impartindo clases de linguaxe musical e piano a máis de corenta alumnos baixo a dirección de Tatiana Pankrátova, tamén fundadora da Coral Xan Mella.

Este ano 2013 a asociación volverá a celebrar a tradicional Cachela de San Xoán o domingo 23 de xuño onde haberá sardiñas e boroa de balde.

Rematou a asemblea cunha pantagruélica cea, cun menú a base de canapés bielorrusos e carne asada por “Maruja de Costa,” que se prolongou ata altas horas da madrugada na que non faltaron as cantigas de sobremesa.

A vindeira actividade da AMC Pepe Valiña será a presentación da novela “Costa do Solpor” de Xosé María Lema, o venres 22 de marzo ás 21:00 horas no Auditorio do Pavillón de Baio